Gagnagátt Sjúkratrygginga Íslands

Gagnagátt er „mínar síður“ fyrir heilbrigðisstarfsmenn¹ og rekstraraðila sem eru í viðskiptum við Sjúkratryggingar Íslands (SÍ). Almennar leiðbeiningar

I. Upplýsingar í Gagnagátt eru tvískiptar

• Viðskiptaupplýsingar. Upplýsingar um viðskipti rekstraraðila við SÍ s.s. greiðsluskjöl og yfirlit ýmiss konar í tengslum við greiðslur. Aðgang fá allir rekstraraðilar sem eru í viðskiptum við SÍ. Aðgangur er eingöngu veittur í gegnum kennitölu rekstraraðila.

• Upplýsingar um réttindi sjúklinga og umsýsla. Samanstanda af birtingu á réttindastöðu sjúklinga, umsókna, vottorða og ýmissa upplýsinga sem tengjast sjúklingum. Aðgang fá heilbrigðisstarfsmenn¹ og starfsmenn þeirra. Aðgangur er eingöngu veittur í gegnum eigin kennitölu heilbrigðisstarfsmanns.

  1. Heilbrigðisstarfsmaður: Einstaklingur sem starfar við heilbrigðisþjónustu og hefur hlotið leyfi landlæknis til að nota starfsheiti löggiltrar heilbrigðisstéttar.

II. Aðgangur að Gagnagáttinni

Eftirtaldir aðilar hafa aðgang að upplýsingum í Gagnagáttinni:

Persónuverndarfulltrúar. Persónuverndarfulltrúar rekstraraðila og/eða heilbrigðisstofnana geta fengið sérstakan aðgang að Gagnagátt til að senda viðkvæm skjöl til SÍ og móttaka slík skjöl í gegnum gáttina. Til að persónuverndarfulltrúar geti nýtt sér þessa lausn þarf að senda beiðni um stofnun aðgangs til [email protected].

Rekstraraðili (fyrirtæki/stofnanir) fær viðskiptaaðgang með nýskráningu á kennitölu. Lykilorð er sent í netbanka(fyrirtækjabanka) viðkomandi rekstraraðila. Ef lykilorð týnist er það aðgengilegt í netbankanum.

Heilbrigðisstarfsmaður fær aðgang að réttindastöðu og umsýslu með nýskráningu eigin kennitölu. Lykilorð er sent í netbanka viðkomandi heilbrigðisstarfsmanns. Ef lykilorð týnist er það aðgengilegt í netbankanum. Heilbrigðisstarfsmaður sem er í viðskiptum við SÍ í eigin kennitölu fær aðgang að viðskiptahluta og réttindahluta Gagnagáttar með einu lykilorði sem sent er í netbanka.

Starfsmenn í heilbrigðisþjónustu. Rekstraraðili eða veitandi heilbrigðisþjónustu getur veitt starfsmanni (t.d. starfsmanni í móttöku eða í bókhaldi) aðgang að Gagnagáttinni og úthlutað honum aðgangi að upplýsingum sbr. lið I. Virkni til úthlutunar er staðsett inni í gáttinni undir flokknum „Úthlutun á aðgangi“. Aðgangur starfsmanns er á ábyrgð viðkomandi aðgangsveitanda samkvæmt samningi við SÍ. Starfsmaður undirritar sérstaka trúnaðaryfirlýsingu.

III. Hvernig sæki ég lykilorð að gáttinni?

Beiðni um aðgang skal skrá í nýskráningarglugga Gagnagáttar. Ef aðgangur er veittur eru upplýsingar sendar í netbanka rekstraraðila/heilbrigðisstarfsmanns. Þeir sem þegar hafa fengið aðgang skrá sig í innskráningarglugga. Ef lykilorð týnist er það aðgengilegt í netbankanum.

Hvar finn ég lykilorðið í heimabankanum?

Leiðbeiningar um hvernig skal sækja notendanafn og lykilorð í heimabanka:

Hjá Íslandsbanka, Landsbankanum, Arion banka,Sparisjóðnum, Byr, S24 og Netbankanum skal fylgja eftirfarandi þrepum til þess að sækja lykilorð inn í Gagnagátt:

1) Þegar þú hefur nýskráð þig í Gagnagátt er notendanafn og lykilorð sent í heimabankann þinn.

2) Skráðu þig inn í heimabankann þinn.

3) Þegar þú hefur skráð þig inn er hægt að nálgast rafræna skjalið undir "Yfirlit -> Rafræn skjöl" eða "Yfirlit -> Netyfirlit". Undir „Tegund“ ætti að birtast "Lykilorð fyrir Sjúkratryggingar Íslands“. Stilltu viðeigandi dagsetningu og smelltu á „Sækja“. Skjal með notendanafni og lykilorði ætti að birtast.

4) Ef rekstraraðili fær send rafræn skjöl á kennitölu einstaklings (þ.e. fyrirtækið hefur ekki eigin netbanka) þarf hann mögulega að hafa samband við sinn banka til að virkja aðgang að fyrirtækisskjölum.

5) Opnaðu skjalið.

6) Opnist skjalið rétt ætti það að líta svona út.

7) Farðu aftur inn á innskráningarsíðu Gagnagáttar og skráðu notendanafnið og lykilorðið sem kemur fram í skjalinu. Þá áttu að tengjast Gagnagátt.

Gagnagátt Sjúkratrygginga er varin með SSL og öll samskipti á vefnum eru því dulkóðuð. Þegar notandi skráir sig inn þá breytist vefslóðin úr http í https. Í vefskoðaranum má einnig sjá lokaðan hengilás sem er til marks um að vefsíðan sé örugg.

Þegar notandi sækir um aðgang að Gagnagáttinni þá sendir hún notendanafn og lykilorð í netbanka notandans. Lykilorð eru geymd dulkóðuð í grunni kerfisins og enginn hefur því aðgang að þeim. Ef notandi týnir lykilorði sínu getur hann nálgast það í netbankanum sínum.

Lykilorðið kemur í veg fyrir að óviðkomandi aðilar komist inn á svæði notanda og ber notandi ábyrgð á öllum aðgerðum sem framkvæmdar eru undir hans lykilorði. Leiki einhver grunur á að aðrir viti lykilorðið er nauðsynlegt að breyta því við fyrsta tækifæri. Það má gera í Gagnagáttinni undir stillingar.

Það er góð venja að breyta lykilorði reglulega. Lykilorð verður að vera minnst átta stafa langt. Það má vera samsett úr tölustöfum og bókstöfum.